ᑐᙵᓱᒋᑦ ᐱᑭᐊᓚᓱᖅᓱᐊᑉ ᐱᓪᓗᒍ ᑲᑎᒪᔨᖏᓐᓄᑦ
ᐱᑭᐊᓚᓱᖅᓱᐊᖅ (ᓴᕐᕙᕐᔪᐊᖅ) ᐊᖏᓛᖑᔪᖅ ᓴᕐᕙᕐᔪᐊᖑᓪᓗᓂ ᐅᑭᐅᖅᑕᖅᑐᒥ ᐊᒻᒪᓗ ᐆᒪᔪᖃᑦᑎᐊᓛᖑᓪᓗᓂ ᐅᑭᐅᖅᑕᖅᑐᒥ. ᑕᒪᓐᓇ ᓴᕐᕙᕐᔪᐊᖅ ᐊᒥᓱᓄᑦ ᑎᖕᒥᐊᓄᑦ ᑕᒪᐅᙵᖃᑦᑕᓲᓄᑦ ᐅᑭᐅᖅᑕᖅᑐᒧᑦ ᐱᒻᒪᕆᐅᔪᖅ ᐊᒻᒪᓗ ᐃᓄᐃᑦ ᐃᓕᓴᕇᓐᓇᖃᑦᑕᖅᓯᒪᓕᖅᑕᖓ ᐊᒥᓱᓄᑦ ᐊᕐᕌᒎᓕᖅᑐᓄᑦ ᐱᒻᒪᕆᐅᓪᓗᓂ ᐆᒪᔪᕐᓄᑦ ᓇᔪᒐᖃᕐᕕᐅᓂᖓᓄᑦ ᖃᓂᒋᔭᖏᓐᓃᑦᑐᑦ ᓄᓇᓕᓐᓄᑦ ᐊᑐᖅᑕᐅᓲᖑᓪᓗᓂ ᐊᓐᓇᐅᒪᔾᔪᑎᒋᔭᐅᓲᖑᓂᖓᓄᑦ.
ᐸᐸᑕᐅᓇᓱᐊᖅᑎᓪᓗᒍ ᓇᓕᒧᒌᓕᖅᑎᑦᑎᔪᖃᕆᐊᖃᙳᓱᒻᒪᑦ ᐃᓅᓯᕐᒧᑦ ᐃᓕᖅᑯᓯᕐᒧᓪᓗ ᐱᒻᒪᕆᐅᔾᔪᑎᖏᓐᓄᑦ ᐊᓐᓇᐅᒪᔾᔪᑎᒋᔭᐅᓪᓗᑎᑦ ᐊᖑᓇᓱᕝᕕᐅᓲᖑᓂᖓᓄᑦ ᐊᒻᒪᓗ ᓴᐳᔾᔭᐅᓯᓐᓈᕐᓗᓂ ᑕᒪᓐᓇ ᐃᒪᖅ. ᑖᒃᑯᐊ ᐸᐸᑦᑎᓇᓱᐊᕈᑕᐅᔪᑦ ᖃᐅᔨᒪᓇᑦᑎᐊᖅᑎᑦᑎᔭᕆᐊᖃᕐᒥᔪᑦ ᐃᓄᐃᑦ ᐊᑑᑎᖃᖅᑐᒃᑯᑦ ᐃᓚᐅᖃᑕᐅᑦᑎᐊᖃᑦᑕᕐᓂᐊᕐᒪᑕ ᐱᓕᕆᖃᑕᐅᖃᑦᑕᕐᓗᑎᑦ.
ᑲᑎᒪᔨᐅᔪᑦ ᑐᓴᕆᐊᕐᕕᖃᖅᓯᒪᔪᑦ ᐃᓄᐃᑦ ᓄᓇᓕᖏᓐᓂᑦ ᑕᒪᒃᑮᓐᓂᒃ ᐱᑭᐊᓚᓱᖅᓱᐊᑉ ᖃᓂᒋᔭᖏᓐᓃᑦᑐᓂᑦ ᓄᓇᕗᒻᒥ ᐊᒻᒪᓗ ᑲᓛᖡᑦ ᓄᓈᑕ ᐅᐊᖕᓇᖓᓂ ᓄᓇᓕᓐᓂ ᐊᕕᑦᑐᖅᓯᒪᔪᓂᓪᓗ ᐃᓄᐃᑦ ᐅᖃᐅᓯᒃᓴᖏᑦ ᑐᓴᖅᑕᐅᓂᐊᕐᒪᑕ; ᐊᑐᓕᖅᑎᑕᐅᓂᐊᖅᑐᑎᓪᓗ ᓄᓇᖃᖅᑳᖅᓯᒪᔪᑦ ᖃᐅᔨᒪᓂᖏᑦ; ᐊᒻᒪᓗ ᐊᑐᓕᖁᔨᓗᑎᑦ ᐃᓄᐃᑦ ᖃᓄᖅᑑᕈᑎᒃᓴᖏᓐᓂᑦ ᐸᐸᑕᐅᖁᓪᓗᒍ, ᐅᐊᑦᑎᔭᐅᖁᓪᓗᒍ ᐊᒻᒪᓗ ᐊᐅᓚᑕᐅᑦᑎᐊᖁᓪᓗᒍ ᖃᓄᐃᓐᓂᐊᙱᒻᒪᑦ ᐱᑭᐊᓚᓱᖅᓱᐊᖅ ᓯᕗᓂᒃᓴᒥ ᑭᖑᕚᒃᓴᑎᓐᓄᑦ.
ᐱᑭᐊᓚᓱᖅᓱᐊᖅ ᐱᓪᓗᒍ ᑲᑎᒪᔨᐅᔪᑦ ᐱᖓᓱᓄᑦ ᑲᑎᒪᔨᐅᔪᓄᑦ ᓯᕗᒃᑲᑕᖅᑕᐅᕗᖅ: ᐅᑲᓕᖅ ᐃᔨᑦᓯᐊᖅ, ᓄᓇᕐᔪᐊᕐᒥ ᑲᑎᒪᔨᐅᔪᖅ; ᑰᐱᒃ ᑭᓖᔅᑦ, ᑲᓛᖡᑦ ᓄᓈᓐᓂ ᑭᒡᒐᖅᑐᐃᓪᓗᓂ ᑲᑎᒪᔨᐅᔪᖅ; ᐊᒻᒪᓗ ᐄᕙ ᐋᕆᐊᒃ, ᑲᓇᑕᒥᐅᑕᐅᓪᓗᓂ ᑭᒡᒐᖅᑐᐃᔪᖅ ᑲᑎᒪᔨᐅᖃᑕᐅᔪᖅ. ᑲᑎᒪᔨᐅᔪᑦ ᐱᓕᕆᐊᒃᓴᖏᑦ ᐸᕐᓇᑕᐅᓯᒪᕗᑦ ᐊᑯᓂᐅᓂᖃᕐᓂᐊᕐᒪᑦ ᐱᖓᓱᓄᑦ ᐊᕐᕌᒍᓄᑦ ᑲᒪᒋᔭᖃᕐᓗᑎᑦ.
ᖃᕋᓴᐅᔭᒃᑯᑦ ᑐᓴᐅᑎᑎᒍᑦ ᕙᐃᔅᕗᒃᑯᑦ ᓴᖅᑭᖅᑎᑕᐅᖃᑦᑕᖅᑐᑦ @pikialasorsuaq
